Pwede daw nga magsalwad hin impeachment complaint an mga residente kontra ha mga membro han Korte Suprema.
Ine an ginpahayag ni anay congressman ngan presente Liberal Party (LP) acting president Lorenzo “Erin” Tañada III mahuman nga makakuha hin batikos tikang ha publiko an nagin desisyon han Korte Suprema nga gindeklara nga pagtalapas ha balaod an articles of impeachment kontra kan Vice President Sara Duterte.
Pwede daw ig-cite kumo ground ha reklamo an pagtalapas ha Article XI han 1987 Philippine Constitution nga nagpapahayag han Accountability of Public Officers ngan naglalatag han impeachment procedures nga maikokonsidera nga responsable nga pagtalapas ha Batakan Balaod.
Kun dire naman daw, pwede magin grounds an betrayal of public trust para ha dire pagpapatuman han Article XI.
Natuod naman hi Tañada nga dire maabot ha constitutional crisis an pagsasalawad han impeachment complaint kontra ha mga huwes han Korte Suprema mahitungod nga nahitabo na gihapon ine hadto.
Pero gin klaro ni Tañada nga dire nira ginduduso an nasabi nga aksyon kontra ha korte kundi usa la daw ine nga opsyon nga pwede buhaton han mga residente han nasud.
