NATIONAL NEWS– Temporaryo nga nagmando an Cyber Crime Investigation and Coordinationg Center(CICC), nga igsuspendi an access han online game nga GoreBox kahuman han madugo nga panmusil ha San Jose National High School ha syudad han Tacloban dida han Lunes han aga, Hunyo 22.
Sumala ha mga otoridad, usa ha mga minor de edad nga suspek han insidente in nabaruan nga na-adik ha online game nga GoreBox, base han preliminary report han Police Regional Office 8 (PRO-8).
Nagsiring an CICC nga an nasabi nga gaming application in temporaryo nga igblo-block samtang nagpapadayon an imbestigasyon.
Siring ni CICC Undersecretary Aboy Paraiso nga ira temporaryo igblo-block an GoreBox komo precautionary measure hasta nga nagpapadayon an imbistigasyon.
Samtang, nakatalaan gihapon magdumara hin imbistigasyon an Senate Committee on Women and Children, Family Relations and Gender Equality yana nga Hulyo 1, kasumpay han sugad nga panhitabo, kun diin an panuyo amo an paghimangraw han papel han online platforms ha possible nga pag-expose han mga batan-on ngadto han mga bayolente nga impluwensiya.
