Posible pa nga magpatuman hin kadugangan paghitaas ha interest rates an Bangko Sentral ng Pilipinas yana nga tuig mahuman hini igpahitaas an target reverse repurchase rate ha 4.75 porsyento ha ikaduha nga sunod nga pagharampang han Monetary Board.
Magkakaiba an panlantaw han mga ekonomista kasumpay ha susrunod nga pitad han BSP. Ginlalauman han HSBC, Capital Economics, ngan ING nga magkakamay-ada pa hin dugang nga rate hikes, samtang natuod naman an Pantheon Macroeconomics nga posible temporaryo nga ig undang han bangko sentral an pagpapahugot ha monetary policy kun padayon nga mahinay an presyo han lana ngan mahinay an pag-ursa han ekonomiya.
Bisan man kun umubos ha 6.8 porsyento an headline inflation dida han Mayo tikang ha 7.2% dida han Abril, padayon naman nga humitaas an core inflation ha 4.1% nga lahos ha target range han BSP nga duha ngada ha upat kaporsyento. Sumala ha mga analyst, posible pa umubos an inflation ha mga masunod nga bulan kun magpapabilin nga hamubo an presyo han lana.
Ha kaluyo hini, ginmalatumat han pira nga ekonomista nga nagpapabilin nga mahirot an BSP ha pag-atubang ha mga ikaduha nga epekto han inflation, partikular na ha presyo han pagkaon ngan iba pa nga pangunahon nga papliton.
Ginlalauman han ING an kadugangan nga 50 basis points nga paghitaas han interest rates yana nga tuig, samtang ginbabana-bana naman nga magpapabilin ha 4.75% an policy rate kutob ha katapusan han 2026, subay ha Pantheon Macroeconomics.
