Nagpagawas hin panibag-o nga memorandum an Bangko Sentral ng Pilipinas (BSP) agud pakusgon an depensa han mga bangko ngan iba pa nga institusyon nga ginmamanguluhan hini kontra ha nagtitikadako nga hulga nga durot han artificial intelligence (AI) ha pantag han cybersecurity.
Suba ha BSP, malaksi an pag-ursa han AI nga posible maghatag hin dalan ha mga cybercriminal nga mas madagmit matudlok an kaluyahan han sistema, mag-automate hin mga pag-atake, ngan mas haluag nga makapanguwat ha mga buho han seguridad.
Ginmalatumat ni BSP Deputy Governor Lyn I. Javier nga importante an marig-on nga cybersecurity agud mapabilin an pagtapod ha sistema nga pinansyal. Dugang pa hini, an mas marig-on nga depensa in makakabulig nga proteheran an mga kunsumidor ngan mapabilin an kumpyansa ha digital nga ekonomiya.
Ha ilarom han Memorandum No. M-2026-034, gin aaghat an mga institusyon nga magpabilin hin updated inventory han digital assets, gumamit hin multi-factor authentication, ngan ibanan an dire kinahanglan nga internet exposure.
Iginrerekomensda gihapon han BSP an paggamit hin AI-powered cybersecurity tools para ha mas malaksi nga pagtudlok han hulga, pag-monitor han sistema, ngan kadagmitan nga pagbaton ha mga pag-atake.
Dugang pa dinhi, ginpaparig-on an incident response ngan business continuity plans agud masigutado an padayon nga serbisyo ha butnga han cyber incidents.
An nasabi nga aludayday in kaparte han mas haluag nga kampanya han BSP para ha talwas, responsable, ngan epektibo nga paggamit hin teknolohiya ha sektor han pananalapi.
