Ginpahugtan han Bangko Sentral ng Pilipinas o BSP an mga patakaran para ha pagli-lista hin mga virtual asset sugad han mga coin ngan token nga ginhahatag han mga virtual asset service providers o VASPs.
Ginmanduhan han BSP an mga kumpanya nga magdumaa hin mahugot nga panginano ngan akreditasyon ugsa tugutan nga maibalyo o maihatag an mga digital asset ha ira mga platform.
Subay ha memorandum nga ginpagawas ni BSP Deputy Governor Lyn Javier, kinahanglan panginanuon han mga VASP an mga virtual assets subay ha unom nga pangunahin nga aspeto kalakip an backdground han issuer, market maturity, gamit han asset, transparency ngan security, liquidity ngan reserves, sugadman an legal ngan regulatory compliance. Panuyo hini nga masigurado nga mayda suprisyente nga impormasyon ngan proteksyon an mga mamumuhunan.
Ginmanduhan gihapon an mga VASP nga magdumara hin padayon nga panginano ha mga nakalista nga asset ngan magtudlok hin mga standard nga magseserbi nga basaranan ha pagsuspendi o pagtanggal han mga coin ngan token.
Pwede gihapon tanggalon an mga asset kun mayda mga isyu ha regulasyon, cybersecurity, consumer protection, sayop nga impormasyon, o dire komon nga pagkiwa han presyo ha merkado.
Gin klaro gihapon han BSP nga igindidire an paglista ngan pagsuporta han mga anonymity-enhancing o privacy virtual assets.
Subay ha BSP, importante an mas mahugot nga regulasyon agud mapabilin an kadig-on han merkado ngan mapabuilin an pagtapod han publiko ha nagtitikahaluag nga industriya han digital asset.
