TACLOBAN CITY — Patay an usa nga barangay kapitan mahuman nga pagpamusilon han waray pa makilal-e nga mga suspek ha Sitio Lawis, Barangay Palhi, Baybay City Leyte.
Ginkilala an biktima kan Noel Alvarado Oranio, 48 anyos an pangidaron, inasaw-an ngan residente han Barangay Onion, Mahaplag Leyte.
Sumala kan P/Maj. Margarito Salaño, information officer han LPPO, nga sakay han iya ISUZU Dmax an mao nga kapitan han lumusad ini para panginanu-on an kaliding han iya sarakyan ngan tigda nala ini nga ginpanmumusil han duwa nga suspek nga nagpakabangot.
Nag-angkon ini hin igo ha magkadurudilain nga parte han iya lawas nga nagin hinungdan han iya kamatayon.
Ha pagkayana in padayon an gindudumara nga imbestigasyon han mga kapulisan maypaghisumpay ha mao nga insidente.
