TACLOBAN CITY – Gintagan hin duon han National Nutrition Council (NNC) an importansya han pagsunod han usa nga nanay ha programa nga first 1000 days of Child’s Life.
Sumala kan Niño Archie Labordo, Nutrition Officer 3 han NNC Regional Office 8, an mao nga programa nga gin-implementar pira na katuig an nakakalabay in nagpapanuyo nga magkaada hin maupay nga pagpapatubo ha syahan nga mil diyas ha usa nga bata agud nga magkaada ini hin sakto nga nutrisyon.
Dugang pa hini nga usa ha ginkokonsidera nga problema ha sosyodad ha pagkayana labi na gud ha pagpapadako ha mga kabataan an hitaas nga kaso hin stunted o malnourished children tungod nga kulang an nakuha hini nga nutrisyon samtang ginbuburod ini hasta ha pag-anaka hini.
Ginsasagdon han NNC ngan sugadman han health department ha mga nanay nga magbreastfeeding tungod nga napakaimportante ini para magkaada hin sakto nga nutrisyon an bata tikang ha syahan nga unom kabulan tubtob ha pagdos anyos hini.
Gintagan gihapon hini hin duon nga kun magsusunod ha 1st 1000 days of child’s life an usa nga nanay ha pagpatubo han iya anak in dako an tsansa nga mailikay ini ha mga life threatening diseases.
