TACLOBAN CITY – Diri la gihapon maundang pagbulig ha mga mga nanginginahanglan hi Bernandino “Bernie” Tacoy, founder han BGT Cares Foundation ha luyo ginpasakahan ini hin kaso tungod ha panhatag hin relief goods ha mga biktima han landslide ha Baybay City.
Una hini, nanhatag hin hinabang hi Tacoy kaupod an Pitmasters Foundation dida han nakalabay nga Abril 15 ha residente nga biktima han tropical depression Agaton.
Tungod hini, nagsalawad hin kaso hin Matag-ob, Leyte Mayor Michael Torevillas ala kontra kan Bernie Tacoy, iya anak nga hi Vincent Lynbern ngan hi Evangeline Carno ha Office of the City Prosecutor ha Baybay City dida han Abril 28.
Subay ha complaint an ginbuhat daw ni Tacoy kaupod an Pitmasters Foundation in pagtalapas ha Section 104 han Omnibus Election Code ngan Comelec Resolution 10695.
Nakasurat ha section 104 han Omnibus Election Code nga bawal manhatag hin donasyon, kontribusyon, regalo, kwarta man o iba pa an mga kandidato pati na an ira asawa, paryente, campaign manager or bisan hin o nga representante durante han campaign period, ugsa ngan ha adlaw mismo han eleksyon.
Hi Tacoy in nakandidato pagka-mayor ha Matag-ob kaatbang ni Mayor Torevillas ngan tigsiring liwat pagkabise mayor an iya anak nga hi Vincent ngan pagkonsehal hi Evangeline.
“Bisan pa kada adlaw ko nila ug kasuhan ug para lang sa pagpaundang sa akong intensyon nga mutabang, let it be.Pakasuhi ko nila adlaw adlaw, di jud na makapugong sa akua nga mutabang”, pahayag ni Tacoy ha usa nga interview.”
Pero usahay sakit kaayo hunahunaon nga naay usa katawo nga nangandoy makatabang sa iyang igkasi tawo pero tungod lang sa pulitika, gusto nila gub-on an usa katawo”, kadugangan nga pahayag hini.
“Dili ni pamulitika kay dili residente sa Matag-ob ang amoang gitabangan”.
Samtang nakarawat na han poder ni Tacoy an subpoena han piskalya ngan nakagsalawad na liwat hira hin counter affidavit.
