TACLOBAN CITY – Welcome daw para ha Bureau of Fire Protection (BFP) Regional Office 8 an pagbubuhaton nga imbestigasyon han National Bureau of Investigation (NBI) bahin han pito nga mga BFP trainees nga nagkasakit ha kidney samtang nagti-training.
Una hini, personal nga kumadi ha Tacloban hi DILG Secretary Benjamin Abalos para panginanuon ngan umaro hin bulig ha NBI agud nga magkaada hin imbestigasyon kun ano rason han mao nga panhitabo.
Sumala kan Fire Chief Supt. Rodolfo Denaga, Regional Director han BFP 8, abre para ha ira an mao nga pagbubuhaton nga imbestigasyon agud nga masabtan an kamatuoran sugadman malimpyuhan an ngaran han mga personnel nga nagdudumara han training.
Makakabulig gihapon daw ini ha pagpapaupay han sistema han BFP kun mayda nira kinahanglan nga bag-uhon agud nga dire na mautro an mao nga panhitabo.
