TACLOBAN CITY – “Waray Shellfish ban ha mga kadagatan ha rehiyon,” ine an gin pahibaro ni Bureau of Fisheries and Aquatic Resources Eastern Visayas Information Officer, Christine Gresola ha publiko mahitungod nga negatibo ha Paralytic Shellfish Poison o red tide toxin an mga meat samples nga nakuha ha mga kadagatan ha rehiyon.
Pero bisan paman kun waray shellfish ban in mayda usa nga baybayon nga nagpapabilin ha ilarom han Local Red Tide Warning, amu an Matarinao Bay ha Eastern Samar nga nasakop han General MacArthur, Quinapondan, Hernani, ngan Salcedo.
Karuyag sidngon, nag-positibo ha Pyrodinium bahamense an tubig-dagat o filtered seawater samples nga ginkuha ha nasabi nga kadagatan.
Kasumpay hine, ginpapahimatngunan an publiko nga magsunod ha mga precautionary measures ngan tumuod ha mga ginpapagawas nga abiso han buhatan agud malikay ha kadelikaduhan ngan maproteheran an ngatanan ha posible nga peligro nga maidudurot han pagkaon hin pangti-on ngan alamang o hipon nga tikang ha nasabi nga kadagatan.
Gin hahangyo naman an ngataanan nga likayan an panguha, pagkon, pagbaligya, ngan pagbiyahe han mga nasabi nga laman-dagat nga tikang ha Matarinao Bay.
Pwede naman igkonsumo an isda, nu-os, pasayan, ngan masag basta siguraduhon la nga presko an mga ine, tatanggalan han mga tina-e, hasang, ngan lilimpyuhan hin maupay gamit an running water.
