TACLOBAN CITY – Target han Bureau of Fisheries and Aquatic Resources (BFAR) Regional Office 8 nga padayon nga makapagdistribwer hin fuel discount cards ha mga parupangisda ha iba pa nga mga probinsya ha rehiyon.
Ini in mahuman an ira pandistribwer hin sobra 1000 nga mga fuel discount cards ha probinsya han Leyte.
Sumala kan Christine Gresola, tagapagyakan han BFAR Regional Office 8, sobra 2,000 nga mga fisherfolks an ira target nga matagan ha Leyte samtang gintatalinguha naman nira nga makagtikang ha pandistribwer hini ha Samar provinces ngan iba pa nga probinsya ha rehiyon pag abot han bulan han Agosto.
Utro naman nga nagpahimatngon an BFAR ha mga nagkatatagan na han mao nga fuel discount cards nga magsunod ha ira ginkasarabutan bahin han paggamit han mao nga mga cards.
Ha ira ginpirmahan nakabutang nga an ira discount cards in pwede la nira magamit pagpalit hin gasolina o krudo ha mga accredited gasoline stations ngan dire ini nira pwede mawithdraw hin cash.
Kun mapapamatud-an nga nakatalapas an usa nga benepisaryo han mao nga kasarabutan, may katungod an BFAR nga iglock o igdisable an ira mga cards ngan dako gihapon an posibilidad nga dire na an mga ini makakarawat han mao nga ayuda.
Nagpahimatngon gihapon an BFAR nga nata-track nira kun ano an mga transactions han mga discount cards nga ira ginpandistribwer sanglit dire ini pwede nga igpansak ha mga atm machines.
