TACLOBAN CITY – Ginhihingita hiton Bureau of Fisheries and Aquatic Resources (BFAR 8 ) nga maparibhong iton produksyon hin isda nga tuna ha Sinirangan Bisayas pinaagi hin pagkaaada hin Tuna Development Program.
Sumala kan Cristine Gresola, tagapagyakan han Bureau of Fisheries and Aquatic Resources (BFAR 8 ) ginpresentar nira an plano han BFAR-8 para mabuligan an mga purupangisda nga mas mapakusog an produksyon han tuna ha rehiyon.
Kalakip ha proposal an pagkaada hin mga cold storage facility, value added tuna products, capacity building han mga mangirisda ngan pagpalit hin dako nga barko nga pwede gamiton han mga gugti nga mga purupungisda ha ira pagkadto ha open sea kon diin madadakop an damo nga tuna.
Nahibaruan han buhatan hiton BFAR-8, nga damo iton tuna ha Guiuan ha Eastern Samar ngan ha Northern Samar pero gindidiresto ini ha General Santos City para didto igbaligya.
Pinaagi ha tuna development project, mas mapapahimulusan han mga purupangisda ha rehiyon an nadadakop nga tuna ha Eastern ngan Northern Samar.
Pagklaro ni Grisola nga nagkikinahanglan an mao nga proyekto hin multimillion pesos nga pondo ngan diri ini akos nga pondohan han BFAR-8 sanglit, ginpresentar ini nira ha mga non government organization ngan ha national government para makabulig ha pagpondo.
Positibo naman an BFAR nga magigin malinampuson ini nga ira project proposal.
