TACLOBAN CITY: Sobra Php27.4M nga kantidad han mga interbensyon ha pangisda an ginhatag ngadto han mga kwalipikado nga mga benepisyaryo han asosasyon han mga mangingisda ha Eastern Visayas durante han Bagong Pilipinas Serbisyo Fair (BPSF) ha Tacloban City.
Sumala kan Cristine Gresola, Information Officer han Bureau of Fisheries and Aquatic Resources BFAR-Eastern Visayas, 3 nga 62-foot nga mga barko (handline/bagnet), ha ilarom han Capacitating Municipal Fisherfolk Program nga nagkakantidad hin Php27 milyon, ngan 10 nga 22-foot nga Fiber Reinforced Plastic (FRP) nga mga barko nga nagkakantidad naman hin Php449,948 an iginhatag ngadto han Sipag ha Tiyaga Fisherfolk Association han Abuyog, Leyte.
Dugang pa ni Gresola, kalakip dinhi an Hingatugan Agri-Farmers and Fishers Association han Silago, Southern Leyte; an Asosasyon ng Mangdaingis Magsasaka ha Agutay han Maripipi, Biliran; ngan an Doos Del Fisher Surfolks Association han Hindang, Leyte.
Mababaruan, nga an BPSF ha Tacloban, an ginkokonsidera nga pinakadako ngan pinakadako nga service caravan nga ginhimo ha nasud tikang han pagtikang hini, nga mayda harani 250,000 nga mga indibidwal tikang ha magkalainlain nga sektor.
Ginbabana-bana naman nga naka-karawat ine hin Php1.2 bilyon nga kantidad nga bulig tikang ha gobyerno.
An BPSF usa nga programa ni President Ferdinand Marcos Jr., nga an tumong an epektibo nga paghatag hin mga serbisyo han gobyerno ha publiko.
