TACLOBAN CITY- Ginkakalipay nga igpahibaro han buhatan han Bureau of Fisheries and Aquatic Resources BFAR-8, nga hira an nagtagmangulo ha gindumara nga implementasyon han Fisheries Administrative Order (FAO) 263 partikular na ha Fisheries Management Area (FMA) 8 agud nga tagan hin sakto nga hibaro an publiko kasumpay dinhe, ngan opisyal naman ine nga ginlunsar ha syahan nga higayon han nakalabay nga petsa 21 han presente nga bulan an FMA Website ha nasod- an https://fisheriesmanagementarea8ph.com
An mao nga website, in nagpapanuyo nga maghatag hin hibaro ha publiko an ginpagkaurusa nga panuyo ngan mga hirimuon han magkalain-lain nga ahensya han gobyerno, mga sektor han pangisdaan, ngan Non-Government Organizations agud nga mapabilin an kalimpyo ngan maribhong an FMA 8.
Sumala kan Christine Gresola, Information officer han Bureau of Fisheries and Aquatic Resources BFAR-regional office 8 nga padayon nira nga gin-aaghat an publiko nga protihiran an FMA 8 ngan igduso an epektibo nga pamaagi han pag-atiman han kadagatan pinaagi han pagbisita ha mao nga website ngan makig-koordinar ha tanan nga kinahanglanon, agud nga pamabilin an maupay ngan maribhong nga kadagatan.
Dugang pa han mao nga opisyal nga agud gihapn maprotektaran an kapakanan han kada indibidwal nga Pilipino nga parupangisda, dire la yana kundi magin ha mga masunod pa nga henerasyon.
