Gin-abrihan na han lokal nga gobyerno han Barugo an Barugo Municipal Hospital Wellness Hub, usa nga bag-o nga extension service han Barugo Municipal Hospital nga may panuyo nga magpauswag han serbisyo medikal para ha mga mulupyo han bungto ngan ha mga kahigrani nga lugar.
Sumala kan Barugo Mayor Aron Balais, pinaagi han bulig han SM Foundation, naitindog an wellness hub nga may dugang nga mga higdaan para han pediatric unit, bag-o nga pasilidad para ha mga senior citizen, ngan may-ada liwat isolation room agud mas mahatagan hin eksakto nga pag-ataman an mga pasyente. Ginpahayag niya nga siyam tubtob napulo nga dugang nga higdaan an igin-andam para ha pasilidad.
Dugang pa han alkalde, ginpreparar na gihapon an wellness hub para han pagbutang hin dialysis unit nga magkakamay-ada tulo nga dialysis machine. Ini in paglalauman nga makakabulig ha mga pasyente nga may-ada chronic kidney disease agud diri na kinahanglan bumiyahe ngadto ha Tacloban City para la makapagpa-dialysis.
Ginpahayag gihapon ni Mayor Balais, nga dako ini nga bulig para ha mga residente han Barugo kay mas mapapahirani na ha ira an kinahanglanon nga serbisyo medikal. Labot pa hini, makakaserbi gihapon an wellness hub ha mga pasyente tikang ha mga kahigrani nga mga bungto nga nagkikinahanglan hin pareho nga serbisyo.
Ha pagyakana, may-ada average nga 22 nga pasyente kada adlaw an gin-aataman han Barugo Municipal Hospital. Tungod hini, ginlalauman han lokal nga gobyerno nga an bag-o nga wellness hub in makakabulig ha pagpauswag han kapasidad han ospital ngan makakabaton ha nagtitikadamo nga panginahanglan han publiko ha serbisyo panlawas.
Ginpabug-atan liwat han alkalde nga waray bayad an mga serbisyo nga ighahatag han wellness hub sumala ha mga programa han lokal nga gobyerno ngan han nagbulig nga institusyon.
