Nakakarawat an Barugo, Leyte hin Seal of Good Financial Housekeeping yana nga tuig kun diin, ini na an ika-12 nga higayon nga nakarawat nira ini nga pagkilala.
Malipayon nga kan Barugo Leyte Mayor, Dr. Aron Balais nga ini nga pasidungog in nakarawat nira ha sagunson ka-tuig, tikang han magtikang ini nga distinction award nga ginpapangunahan han Department of Interior and Local Government.
Nakab-ot nira an nasabi nga award mahitungod ha ira maupay nga pagkapot han pampubliko nga budget nga gingagamit nira ha pagpaparibhong han munisipalidad ngan paghatag hin maupay nga serbisyo publiko ha mga taga-Barugo.
Gina-awaran mangud hiton DILG an mga lugar nga mayda transparensiya ha paggamit han mga pondo o kun mayda nakikit-an nga resulta ha mga proyekto nga ira ginpapatuman, mayda accountability an bug-os nga lokal nga pangobyernuhan, ngan compliant ha mga aludayday han Commission on Audit nga kun diin, natutuman ini han munisipalidad.
Samtang, dugang naman ni Mayor Balais, nga mawaray man o mamayda nira makarawat nga pagkilala, padayon iton ira pagduduso, paningkamot ngan tangkod nga pagseserbisyo ha mga molupyo para han igkaka-uswag han bug-os nga munisipalidad han Barugo.
