TACLOBAN CITY – Nagin manilampuson an gindumara nga 12th edition han Banka Rumba Open Tournament dida han nakalabay nga Martes, June 25, 2024 kun diin, an nasabi nga paisan-isan in ginbuhat ha baybayon han Cancabato Bay ha siyudad han Tacloban.
Sumala kan Felix Dumlao, Coordinator hiton Fishery Law Enforcement Team han Tacloban City nga an panuyuan hini nga paisan-isan in agud tagan hin pagkilala han mga kontribusyon han mga lokal nga purupangisda.
An duha ka adlaw nga torneo in may ada tulo ka kategorya, sugad nala hiton Paddle Race, Bankarera ngan Regatta; kun diin, kada usa nga kategorya in may ada naman 20 nga mga koponan nga nagpartisipar nga tikang ha siyudad han Tacloban ngan kahirani liwat nga mga bungto ngan munisipalidad.
Samtang, an mao nga tinuig nga torneo in ginorganisa han Fisheries Law Enforcement Team (FLET) kaupod an iba pa nga government agencies kun diin, ini nga mga sports-related nga mga aktibidades in ginkasarabutan han lokal nga pangobyernuhan hiunong gihapon han kapistahan ni Senor Sto. Nino de Tacloban.
