TACLOBAN CITY – Ginkalipay han mga drivers ngan operators han mga filcab nga mayda byahe Tacloban-Campetic nga ruta nga gintugutan na hira nga makasulod balik ha downtown area han Syudad han Tacloban mahuman nga temporaryo nga igin yakan ni Tacloban City Mayor Alfred Romualdez an pagdiri nga makasulod an mao nga ruta ha downtown area.
Sumala kan Michael Camiller, Presidente han RELTRANSCO nga dako an nagin epekto han diri pagtugot nga makasulod ha downtown area, in labi na adtun ira naman income, ngan pati gihapon ha mga pasaheros.
“Labi na gud adton talahuron nga Mayor Alfred Romualdez, nagpapasalamat kami, tikang ha amon kinasingkasing nga gintagan kami liwat hin higayon nga makasulod naliwat ha Syudad han Tacloban.” yakan ni Camiller durante han pakipaghimangraw ha programa nga Bombo Hanay Sa Udto.
Dugang pa ni Camiller nga dako manggud an maaapektuhan nga mga commuters tungod nga an ira ruta in naagi ha mga dagko nga mga eskwelahan nga kaurugan naman in mga estudyante an ira mga pasaheros.
Nagpasalamat gihapon ini ha mga commuters tungod han ira iginpaabot nga pagsuporta ha ira pinaagi han pagpagawas gihapon han ira naman nga komento.
Kanina han aga, in gin anunsyo ni Romualdez an temporaryo nga pagsuspendi han bag-o nga route plan nga nagbabawal nga makasulod ha downtown area an mga filcabs nga mayda ruta Tacloban-Campetic agud naman daw nga diri maapektuhan ngan kurian an mga commuters.
“But at the moment, now, I am suspending first the not allowing them until they straighten out with LTFRB. Because dapat naman, para hindi mahirapan ang mga students, hindi mahirapan lahat ng bumabyahe,” siring ni Romualdez ha usa nga interview.
Pagklaro pa ni Romualdez, nga an pagsuspendir in temporaryo la kutob naman daw nga magin mahapsay an Local Public Transport Route Plan.
“Hanggang maayos namin yung coordination, because I don’t like maantala naman yung pag eskwela ng mga bata, diba? Kailangan ayusin muna yun” yakan pa ni Romualdez.
“I will suspend first the ordinance because of that and we will coordinate closely with the LFTRB, and the other agencies. Kasi ho, clamor din ito ng Tacloban Transport Group, kasi sabi nila, naagawan din sila ng mga pasahero. So we have to come up with a win win situation,” siring ni Romualdez.
Hingyap naman han mga draybers nga matagan naman hin aksyon an ira iginpasa nga dokumento ha Sangguniang Panlungsod han Tacloban.
