TACLOBAN CITY— Pormal nga ginlunsar han LGU-Borongan an “Balay Paglaum” ha Barangay Sohutan, Borongan City, kasumpay hiton padayon nga pag-atiman han Children In Conflict with the Law.
Ini an syahan ngan nag-uusaan nga shelter para ha mga kabataan nga nakatalapas han balaud ha bug-os nga probinsya han Eastern Samar.
Sumala naman kan City Social Welfare and Development Officer, Verina Amoyo, an rason han pagtukod han Balay Paglaum in kabahin han padayon nga inisyatiba han lokal nga pangobyernuhan hiton Borongan, ngan pagbulig ha mga kabataan ha krisis, partikular na adton nage-edad 15 ngadto ha 18 anyos, samtang naghuhulat han desisyon han korte o han ira pagbalhin ngadto ha iba nga ahensya o hurisdiksyon.
Dugang pa niya, maghahatag gihapon an Balay Paglaum hin mga serbisyo nga makakabulig ha panlawas, nutrisyon, psychology, edukasyonal, ngan legal nga panginahanglan han mga kabataan.
Mayda liwat ini mga sesyon para ha mga kag-anak, espesyal nga interventions para ha mga kabataan nga nadadabi ha droga, ngan usa nga multi-disciplinary team nga magbabantay han operasyon han nasabi nga center.
Ginpaangbit pa ni Amoyo, ha kaluyo nga makabirido nga mayda kabataan nga nakakatalapas ha balaod, ine nga Balay Paglaum, in magdadara ha ira hin bag-o nga paglaom ha ira kinabuhi agud nga maibalik an mga ine ha sakto nga panginabuhi.
