Igin duduso yana ha senado an balaudnon nga may panuyuan magpatuman hin mas mahugot nga transparency ha mga kumpanya han lana ha nasud kasunod han mga reklamo han publiko ha daw sayo ngan maka-urusa nga pag hitaas han presyo han petrolyo.
Ha ilarom han Senate Bill No. 641, gin tatagan hini hin gahum an Department of Energy (DOE) nga obligahon an mga oil companies nga igsumiter an detalyado nga datos han mga presyo han lana nga ira igin baligya kaupod na an aktwal nga gastos han mga ini.
Magkakaada gihapon hin awtomatiko nga mekanismo nga magsusugo ha mga kumpanya nga ig gawas an ira mga gin gastos ngan kun ini ba in umabot ha igin talaan nga presyo han Dubai crude oil basar ha Means of Platts Singapore (MOPS).
Sumala ha co-author han mao nga balaodnon nga hi Senator Erwin Tulfo, angay la nga magin transparent an mga oil companies ha ira mga aktuwal nga costing lugod mag isa hin price hike basar ha nahihinabo nga gyera ha middle east.
Samtang, manunumduman nga ha nahinabo nga hearing han Senate Committee on Ways and Means, igin malatumat han DOE nga gin padad-an na hin surat han mao nga ahensya an mga gas stations agud mag hatag hin baton ha daw pag singabot ug pag-aabuso han mga ini ha sitwasyon ilabi na ha nahihinabo nga tensyon ha Middle East.
Sugad man, aminado an mao nga ahensya nga limitado an ira kapas ha ilarom han na eksister nga Oil Deregulation Law.
Kasumpay hini, igin mando ni Tulfo an panginahanglan hin mas permanente nga solusyon pinaagi hin balaud agud masiguro nga may katungdanan an mga kumpanya bumaton sugad man magin protektado an mga konsyumer.
