LAPINIG, NORTHER SAMAR – Patay na han makit-an ha kanal an usa nga babaye ha Brgy. Imelda, Lapinig, Northern Samar dida han nakalabay nga adlaw, Hunyo 26.
Ginkilala an biktima kan alyas Virgie, 35-anyos an pangidaron, ngan residente han nasabi nga lugar.
Sumala kan Lapinig Municipal Police Station Acting Chief of Police, PCpt. Marlo Capate, basar haira panginano ha patay nga lawas in dire na presko an dugo han biktima han maireport ine ha ira.
Gin aalegar naman nga ginpatay an biktima dida han maagahon han nasabi nga adlaw mahitungod nga mamara na an dugo hine.
Basar pa han imbestigasyon, gin aalegar nga nakadamo pukpuka hin bato an biktima mahitungod nga medyo nayupi an nawong hine.
Labot pa hine, subay han report tikang ha doktor, mayda gihapon tinusukan ha ulo hine.
Ha pagkayana in mayda na person of interest an mga kapulisan kasumpay han insidente, pinaagi han gindurugtong nga mga ebidensya.
