TACLOBAN CITY- Nagpapadayon an water delivery ha norte nga barangay partikular na ha mga nag-uukoy ha mga relocation sites o kun pabahay dinhe ha syudad han Tacloban.
Sumala kan Ruth Ramirez, Executive assistant IV han North City Hall Extension, nga ine nga pagdeliver han patubig ha mga pabahay in tikang pa ine han nakalabay nga 3 ka tuig ngan hasta yana in nagpapadayon ine.
Aminado naman an mao nga opisyal, nga mayda mga higayon nga nadedelatar an ira pag-deliver han tubig ha kada-pabahay ngan dire natugma ha petsa o adlaw han pagdeliver.
Ginmalatumat hine nga usa ha mga nagigin rason han ira nga lapses ha pagdeliver in an tigdaay nga pagkaguba han sarakyan pero ginsisigurado naman daw han ira mga tinaglawas nga maidedeliver an mao nga patubig ha kada villages ha norte nga parte han syudad.
