Ginkasuhan han Office of the Ombudsman hi anay Overseas Workers Welfare Administration (OWWA) Administrator Arnell Ignacio hin Usurpation of Official Functions kasumpay han kontrobersyal nga P1.4 billion property acquisition han ahensya.
Sumala kan Department of Migrant Workers (DMW) Secretary Hans Leo Cacdac, nakarawat gihapon han ira ahensya didas han Hulyo 7, 2026 an resolusyon han Ombudsman nga mayda petsa nga Hunyo 19, 2026.
Basar ha resolusyon, ginpirmahan ni Ignacio an contract to sell, deed of absolute sale, ngan an kasumpay han addendum han transakyon, Gin aprubahan gihapon hini an pagpapagawas hin pondo han gobyerno bisan waray katugutan tikang ha OWWA Board of Trustees.
“The finding of the Ombudsman is to charge the former administrator with usurpation of official functions under Article 177 of the Revised Penal Code,” sumala kan Cacdac.
Subay pa ha Ombudsman, gumios hi Ignacio nga baga-baga hin mayda hiya gahom tikang ha OWWA Board bisan kun maaram ini nga waray hiya otoridad. Mahitungod hini, ginpahayag han ahensya nga dire la ini simple nga administrative non-compliance kundi usa nga pagtalapas nga sulod ha krimen han Usurpation of Official Functions.
Natudlok gihapon ha resolusyon nga an kawaray hin pag-apruba tikang ha Board in dire la teknikal nga pagkukulang, kundi usa nga paglikay ha institutional oversight ngan transparency nga gintalaan ha OWWA Charter.
Igin eksplikar ni Cacdac nga an nasabi nga kaso in pwede magresulta ha pagkakapreso tikang ha unom kabulan kutob ha upat katuig, depende ha magigin desisyon han korte. Gin manduhan gihapon han Ombudsman an pagsasalawad han kaangayan nga imopormasyon kontra kan Ignacio.
Samtang, ha bulag nga bahin han resolusyon nga naghihingaday ha mga reklamo kasumpay han pagtalapas ha Anti-Graft and Corrupt Practices Act, malversation of public funds, ngan plunder.
Sugadman, iginbasur han Ombudsman an mga corruption complaints kontra ha pira nga anay opisyal han OWWA ngan mga pribado nga indibidwal nga dabi ha pagbaligya han tuna.
Ginmalatumat ni Cacdac nga magsusumite an DMW hin Motion for Reconsideration agud hangyuon ha Ombudsman nga utro panginanuon an mga nasabi nga reklamo.
