TACLOBAN CITY – Nagbilin hin usa nga patay an ginbuhat nga panmumusil han armado nga grupo mahuman nga aksidente nira nga maigo hin bala an ira kausa ha Gandara Samar.
Sumala kan Police Captain Joselito Tabada, chief of police han nasabi nga bungto ginkilala an namatay nga hi Zosimo Casaljay, usa nga wanted ngan may nakabinbin nga aresto para ha kaso nga murder.
Nag angkon ini hin igo hin bala ha ulo nga nagresulta han iya dayon nga kamatayon.
Nagawas ha imbestigasyon han mga kapulisan nga gin- strafing han mga suspek iton mga kabablayan ha Brgy. San Antonio han nasabi nga bungto kon diin nadabi pa an panimalay han kapitan nga hi Ramon Corocoto Sr. ngan han pipira nga mga kagawad.
Maswerte naman nga nakatalwas an barangay kapitan ngan iba pa nga opisyal han barangay nga ada ha sakob han ira mga panimalay.
Tungod han waray hunong nga pagpauran hin bala han mga suspek nagkaplag an mga tawo ha iba iba nga direksyon ngan waray na nira kakit-i nga kausa na ngay-an nira an ira napusil.
Pahayag pa ni Tabada nga an grupo nga umatake in ginpapangunahan daw han usa nga nagngangaran kan Edmar Wahingon.
Ginngaranan liwat an iba pa nga mga suspek nga hira Jason Wahingon, Ruel Wahingon, Onyot Wahingon, Erwin Loberando, Constancio Sumagdon, Jun Verano, Joel Suarino, Zosimo Casaljay, usa nga alyas Pagras, Ronick, Olok, ngan Dunggaw kon diin gintuuhan nga paprehas hira residente han Barangay Olira ha Calbayog City.
Politika naman an ginhihingita nga motibo han krimen.
Mahuman an insidente narekober han mga otoridad an mga basyo hin bala tikang ha iba iba nga kalibre hin pusil.
Gindara liwat ha Gandara Rural Health Unit an patay nga lawas han suspek para igpailarom hin postmortem examination.
Ha pagkayana nagbubuhat na hin hot pursuit operation an mga kapulisan para madakop an mga nakaeskapo nga suspek.
