TACLOBAN CITY– Gin-esplikar hiton Archdiocese of Palo Leyte, an panawagan han Catholic Bishops Conference of the Philippines (CBCP), ha publiko nga maki-usa nga magsul-ot hin kolor busag nga bado kinada Domingo kun an mga ine maatinder hiton misa.
Sumala kan Archdiocese of Palo, Social Media Coordinator, Fr. Chris Arthur Militante, panuyo hine nga panawagan nga igpahinumdom ha ngatanan kasumpay hiton kabutang yana han nasud Pilipinas, ngan an importansya hiton pag-ampo ngan an pakikiduyog ha mga naapektaran hiton kalamidad sugad hiton bagyo ngan linog.
Ginpaangbit naman Fr. Militante, nakadepende naman ha mga lokal bishops kun an mga ine in mayda igdudugang nga kamanduhan, matungod nga role hiton CBCP in maghatag la hin suhestyon.
Dugang pa hine, an Archdiocese of Palo naman in nakikiduyog ha nasabi nga kamanduhan.
Mababaruan nagpagawas hin kamanduhan an Catholic Bishops Conference of the Philippines (CBCP) nga magsul-ot hin kolor busag ha kada pag atendir hin misa kada Dominggo ngan pagbutang hin white ribbons ha mga panimalay, sarakyan, ngan magin ha mga pampubliko nga mga lugar tinikangan yana nga bulan hiton Oktubre kutob Nobyembre yana nga tuig.
Panuyo han nasabi nga pagsul-ot hiton busay ngan pagbutang hiton mga ribbons in panawagan ha transparensiya, responsibilidad ngan good governance sugadman an pagtindog kontra ha korapsyon para malimpyuhan an atun nasud ha mga kasaypanan ngan mga diri Kristuhanon nga mga buruhaton.
