TACLOBAN CITY – Gin eksplikar han Information Officer I han Department of Social Welfare and Development (DSWD) Field Office 8 an approach nga ira gingagamit ha pagtudlok han mga kalagsan nga pwede maibulig ha Social Pension nga programa; an bottom-up approach an approach nga gingagamit han mga ine kun diin nagtitikang ha pinakaubos an proseso hine o ha barangay level.
Makakarawat manggud an usa nga senior citizen nga nag-uukoy ha Pilipinas han iya social pension kun mag-edad na ine hin 60-anyos o sobra pa, labi na nga adton mga nagkukuri gud nga mga senior citizen la an posible nga mahibulig ha nasabi nga programa.
Sumala kan Ivan Malquez, Information Office I hiton Department of Social Welfare and Development (DSWD) Field Office 8, nagtitikang an proseso han pagbulig ha nasabi nga programa pinaagi han pag-tudlok han mga kalagsan nga nagkukuri gud kun diin an presidente han Barangay Senior Citizen Association ha barangay level an naglilista han mga kalagsan nga angay mahibulig kumo an gintudlok nga presidente han asosasyon an mas nakakakilala han mga kalagsan ha ira barangay.
Masaka naman an nasabi nga lista ha City o Municipal Social Welfare Development Office para maisa-pinal na.
Dugang pa hine, mayda manggud mga kalagsan nga nadiretso dayun ha CSWDO o MSWDO kun may-ada an mga ine ginkakaatubang nga isyu haira mga barangay kabahin han nasabi nga programa kun diin ginpapasaka naman daw an nasabi nga isyu ha regional office agud matagan hin solusyon.
