NATIONAL – Sadang daw nga imbestigaran an gin-aalegar “secret campaign” nga ginlunsar han US military ha kasagsagan han pandemya han COVID-19 nga nagpapanuyo nga gub-on an imahe an Sinovac vaccine han China ha Pilipinas.
Ini in ginpahayag ni Department of Health (DOH) Spokesperson AssistanT Secretary Albert Domingo.
Basar ha report, han panahon han pandemya, gintuyo daw han US nga magpasarang hin sayop nga impormasyon ngan duda bahin ha katalwasan ngan pagiging epektibo han mga bakuna ngan iba pa nga bulig nga ginhahatag han China ha mga nasud sugad han Pilipinas.
Sumala ha Reuters nga an Pentagon an nagpapasarang han sayop nga impormasyon han COVID-19 pinaagi han X o anay twitter app.
Gintutudlok hini an dire maubos ha 300 accounts, haros tanan in ginhimo han summer han 2020 nga nakasentro ha slogan nga #Chinaangvirus.
Ginpahayag pa han Reuters nga pagkahuman hini nga pakianhan an X bahin ha mao nga mga account, gintanggal han social media company an mga profile nga gintutudlok nga parte hira ha usa nga coordinated bot compaign basar ha mga patterns han aktibidad ngan data privacy.
Nagtikang daw an anti-vax campaign nga ginbuhat an US military han 2020 ngan nagsarang ha Southeast Asia san-o ini mahuman ha kabutngaan han 2021.
