Gin lunsar han paryente han mga biktima han war on drugs an anti-troll networks ngan iba pa nga support systems ugsa an nakatalaan nga confirmation of charges hearing ni anay Presidente Rodrigo Duterte ha International Criminal Court tinikangan ha adlaw Lunes, Pebrero 23.
Sumala kan Atty. Kristina Conti, Assistant to Counsel ha ICC, ginlunsar an inisyatiba mahitungod nga ginlalauman nga magamit hin mga estratehiya an kampo han mga Duterte dire la ha courtrrom kundi magin ha “court of public opinion” partikular na ha social media, sugad han panarhog ngan pambu-bully ha mga biktima ngan ira mga paryente.
Labot pa hine, ginmalatumat ni Atty. Conti nga gin aandaman na gihapon han mga biktima ngan ira pamilya an posible nga bag-o nga estratehiya han kampo han depensa kaupod na an pag-atubang han anay presidente kumo “kakaiba nga tawo.”
Igin hulagway ni Atty. Conti an posible nga itsura han anay Presidente nga baga-baga hin “ermitanyo” basar na gihapon ha pahayag han mga pamilya han anay Presidente, nga mabusag ngan posible halaba na an buhok.
Gintagan-duon naman han kampo han biktima nga dire dapat magpadara an publiko ha pagbabag-o ha anay Presidente ha pag-atubang hine ha masunod nga semana ha international tribunal.
Ha pagkayana, umabot na ha 529 nga biktima an ginkilala han ICC ha tulo nga ihap han crimes againts humanity charges nga iginsalawad kontra ha anay Presidente. Pero, waray pa igpagawas han legal counsels an listahan han mga indibidwal nga maatender ha proceedings ha The Hague, mahitungod na gihapon ha panarhog nga pwede katubangon han mga pamilya han biktima.
