BORONGAN CITY – Ginduduso ni Cong. Christopher Sheen Gonzales, representante han Lone District han Eastern Samar, nga matagan hin aksyon an maiha na nga araba han mga taga-probinsiya, labi na ha bungto han Guiuan, partikular ha isla han Homonhon.
Kasumpay ini han gin-file nga Resolution No. 234 nga nag-aaghat hin imbestigasyon ‘in aid of legislation’ han epekto han pagmimina ha Homonhon Island, Guiuan — lakip na an environmental, social, ngan economic impact hini.
Mahitungod han isyu ha flood control projects, gindig-unan han kongresista nga tikang 2020 ngada yana, sobra P1 bilyon na an na-bidding nga mga flood control projects ha Eastern Samar. Pero, haros 95% han pondo in nahingangadto la ha Oras.
Nagpahayag pa hiya nga makikig-usa hiya kan Cong. Libanan agud pa-imbestigaran kon tinuod nga 100% completed an proyekto, kun maupay an kalidad han panarabaho, ngan kun hin-o an nag- impluwensya ha pag-distribwir han pondo.
Dugang pa, naghimo hi Gonzales hin pormal nga surat ngadto ha Commission on Audit (COA) agud magpatuman hin comprehensive audit ha ngatanan nga proyekto nga sumulod ha district office han DPWH.
Lakíp dinhi an ma-kontrobersyal nga P3 bilyones nga San Rafael Rock Netting Project ha Eastern Samar. (via Bombo Shiela Encio)
