NATIONAL – Gin batikod han Armed Forces of the Philippines (AFP) an Southern Theater Command han China kahuman han joint military exercises han Pilipinas kaupod an Estados Unidos ngan Canada ha West Philippine Sea (WPS).
Gintagan-duon ni AFP spokesperson Colonel Francel Padilla nga an Pilipinas in dire nanhihinlabot ha teritoryo han iba nga nasud kundi gindedepensaran la an kalugaringon hine soberanya ngan teritoryo nga nakasulod ha international law.
An pahayag ni Padilla in kumo baton ha mga pahayag han Tian Junli, tagapagyakan han Southern Theater Command han China, nga nagyakan nga an Pilipinas in nagprubar nga takpan an daw ilegal nga aksyon hine ha rehiyon ngan nagpaduro la han tensyon pinaagi han “military provocations” ngan “media hype.”
Ha usa nga pahayag, igin eksplikar ni Padilla, nga daw dire expansionist an mga Pinoy ngan dire nakikialam ha teritoryo han iba nga nasud.
Gin hingadayan gihapon ni Padilla an desisyon han Permanent Court of Arbitration dida han 2016 nga waray umabuyon ha pag-angkon han China ha WPS ngan ginkikilala an mga katungod han Pilipinas ha exclusive economic zone (EEZ) hine.
Ha kaluyo han nasabi nga desisyon in padayon nga iginduon han China an mga katungod hine ha rehiyon ngan gintawag nga “illegal” ngan “invalid” an desisyon han 2016 ruling.
