Bombo Radyo Philippines' Dugong Bombo 2026, a nationwide blood donation drive, successfully collected nearly 10 drums of blood from 4,365 donors. Support life-saving efforts!
-- Advertisements --

Malinangpuson nga gindumara han Bombo Radyo Philippines an Dugong Bombo 2026 nga may tema nga “A Little Pain, A Life to Gain” usa nga nationwide blood donation drive nga ginpangunahan han Bombo Radyo Philippines Foundation, Inc. kaupod an Philippine Red Cross.

Dudrungan nga gindumara an aktibidad dida han nakalabay nga Nobyembre 14, 2026 ha magkadurudilain nga parte han nasud, kun diin umabot ha 1,964,250 cubic centimeters o kaparehas han haros 1,964 liters, 518 galons, ngan haros 10 ka-drum han dugo an nakolekta tikang ha 4,365 nga malinangpuson nga blood donors ha bug-os nga Pilipinas.

Kinasing-kasing nga nagpapasalamat an Bombo Radyo Philippines ha tanan nga malinangpuson nga nakag-donate hin dugo, sugadman ha mga nagparehistro pero waray tuguti nga makag-donar mahuman umilarum ha medical screening. Nagpapasalamt gihapon an Bombo Radyo Philippines ha suporta han mga partner organization, local government units, civic and community organizations, volunteers, ngan mga magkadurudilain nga grupo nga nagin kaparte han malinangpuson nga aktibidad.

Dako nga bulig an haros 10 drums nga dugo nga nakolekta agud madugngan an suplay han dugo ha mga blood bank, labi na ha butnga han padayon nga pagkinahanglan hini ha oras han pankinahanglan. Ginlalauman nga mas damo nga mga pasyente an mabubuligan ngan matatagan hin higayon nga masalbar an ira kinabuhi.

Sobra pa ha usa nga blood donation drive an Dugong Bombo, ini in nasalamin gihapon ha diwa han malasakit ngan sugadman bayanihan. Kada turo han dugo nga nadonar in naghatag hin paglaum ngan higayon nga makasalbar hin kinabuhi. Kumo pagkilala ha ira pakikiparte, nakakarawat an mga successful blood donors hin espesyal nga Dugong Bombo T-shirt, tubig ngan pagkaon, sugadman bitamina.

Ha tanan nga nag-donate, nakiparte, nagboluntaryo ngan sumoporta ha kampanya, damo nga salamat ha pagbulig agud magin malinangpuson an Dugong Bombo 2026!

“DUGONG BOMBO 2026: A LITTLE PAIN, A LIFE TO GAIN.”