Ginlunsar na han Tacloban City Agriculture’s Office an solar-powered irrigation project ha Barangay 101 New Kawayan agud masulosyonan an kakulangan ha tubig nga naabatan han mga parag-uma mahitungod ha epekto han El Nino, ngan mapakusog an produkyon han mga utanon.
Sumala kan City Agriculture’s Office Head, Romelo Anade nga an nasabi nga proyekto in tikang ha Department of Science and Technology, nga mayda pondo nga P1M. Panuyuan hini in agud matubigan an sobra 2.8 ka-ektarya han umhanan ha lugar.
Gingagamit han solar energy agud paandaron an water pump nga tikang ha balon. Ha sugad nga pamaagi, maiibanan an pagdepense han mga parag-uma ha de-kuryente o fuel-powered nga bomba, nga puydi gihapon magpahamubo ha ira gastos ha produksyon.
Dugang pa ni Anade nga nagdumara hin training an DOST ha mga miyembro han New Kawayan Farmers Association kasumpay ha paggamit han nasabi nga sistema.
Ginlalauman naman nga makakabulig an solar irrigaiton ha pagpaparig-on han suplay han tubig para ha mga pananom ngan pagpapahaluwag han produksyon han utanon ha Tacloban City sugad gihapon an pangandaman para han grabi nga katsirak.
