TACLOBAN CITY – Ginklaro han 8th Infantry Division Philippine Army, nga waray kamatuoran an nagsarang nga himangrawon nga daw dabi an mag-asawa nga hira CPP-NPA-NDF Chairman Benito Tiamzon ngan Wilma Tiamzon ha natabo nga engkwentro ha butnga han mga militar ngan armado nga grupo ha kadagatan nga sakop han Catbalogan City.
Sumala kan Capt. Ryan Layug, spokesperson ng 8th Infantry Division ng Philippine Army, nga ha ira gindumara nga follow-up imbestigation han kasundaluhan, waray an mga ine may nakit-an nga patay nga lawas han nasabi nga mga gintutuohan nga armado nga grupo, sugadman an patay nga lawas han mag-asawa nga Tiamzon.
Ginpaangbit han mao nga opisyal, nga nahikalasan hiya ha nagsarang nga himangrawon kasumpay ha pagkamatay han mag-asawa nga lider han CPP-NPA-NDF ha nasabi nga engkwentro.
Mababaruan nga una hine, gumawas an report na daw sakay an mag-asawa ha civilian motorized pump boat pakadto ha Buri Island kaupod an dire maubos napulo nga armado nga indibidwal han tigda nga bumuto an ginsasakyan han mga ine nga pumpboat.
Ginpahayag pa ni Capt. Layug, nga waray dumangat ha ira nga report o impormasyon nga an mag-asawa nga Tiamzon in nakadto ha mao nga lugar, sanglit nga nahipausa hira kun kay-anu may nagsarang nga report ha daw pagkadabi han nasabi nga mag-asawa nga lider han walhon nga grupo.
Hapagkayana, padayon pa an ira ginhihimo nga imbestigasyon kun diin natabo an nasabi nga engkwentro ha Catbalogan City Samar.
Nanawagan naman ine ha publiko, nga dire dayon tuod ha mga nagsasarang nga report kun waray pa kumpirmasyon tikang ha mga otoridad.
