INTERNATIONAL – Aksidente nga nahulog han usa nga South Korean fighter jet an mga bomba ha usa nga civilian area durante han live-fire military exercise ha Pocheon, South Korea, diin walo katawo an samaran.
Igin-pahayag han SoKor air force, nga aksidente nga nabuhian han KF-16 fighter jet an MK-82 bombs ha gawas han firing range nga nagdurot hin dako nga danyos.
An nasabi nga fighter jet in kaparte han gindudumara nga joint live-firing drills han air force kaupod an Army.
Subay ha impormasyon, 6 nga sibilyan ngan 2 nga sundalo an samaran ha insidente, diin ada ha kritikal nga kondinsyon an upat dinhi.
Samtang, tulo naman nga kabablayan, usa nga Catholic church, ngan usa nga greenhouse an nagkaruruba ha insidente.
Kasumpay hini in nangaro naman hin pasaylo an air force ngan nagpatapod nga maghahatag hin kompensasyon ngan kaangayan nga bulig ha mga biktima ngan mga nadarahigan.
