TACLOBAN CITY– Lumos la gihapon ha tubig-baha an munisipyo han Matag-ob Letye, dara han makusog nga uran, kun diin maabot ha 500 nga mga evacuees an nahipatik nga ginbakwit ha mga evacuation center matungod ha posible nga magin epekto ni bagyong Opong.
Labot la ha pagbaha, nagkamayda gihapon hira hin mga pagpan-pan hiton tuna.
Sumala kan Matag-ob Leyte Mayor Bernie Tacoy, subay ha ira nagin ocular inspection, waray naman may nasamaran o namatay ha nasabi nga bagyo matungod nga kakulop pala in nagbandilyo na hira ha ira nasasakupan nga man bakwit, partikular na adton nag-uukoy ha mga low-lying areas.
Kun diin ha pagkayana, in nagpapabilin pa an mga ine ha evacuation center, matungod nga lumos la gihapon ha tubig-baha an ira mga panimalay.
Dugang pa ni Tacoy, apektado naman hapagkayana an ira mga pananom nga humay, ngan padayon pa an ira ginhihimo nga panginano kun pira an danyos nga ginbayaan han nasabi nga bagyo ha sektor han ira pananom.
Ginsigurado naman han nasabi nga alkalde nga ira gin-aasisteran an mga evacuees, kun diin nakag-hatag na hira hin pagkaon ngan mga hygiene kits nga gagamiton han mga ine.
Ginpaangbit naman hine nga usa ha mga rason kun kay-anu nagrabi an pagbaha ha iya nasasakupan, matungod han dire maupay nga paghingayad han mga flood control project, ngan mga substandard materials nga gingamit han mga contractors hiton DPWH.
Subay pa kan Tacoy, an mga naguba nga mga flood control project kakulop in gindeklara nga 99% completed na, ngan ine nga proyekto in sakop han 4th engineer, ha ilarom ni Congressman Richard Gomez.
