NATIONAL NEWS– Ginpahayag hiton Department of Foreign Affairs (DFA) nga maabot ha 35 diplomatic protest an ginhaon han Pilipinas kontra ha China yana nga tuig.
Tanan ine in pormal nga ginsumiter ha Chinese Embassy ha Manila.
Sumala kan DFA Spokesperson Angelica Escalona, dire kalakip ha mga ihap an mga diplomatic protest nga posible ighaon kasumpay han nahitabo han nakalabay nga harassment ngan delikado nga maniobra han mga barko ngan eroplano han China kontra ha mga yunit han Pilipinas ha Bajo de Masinloc (Scarborough Shoal).
Usa na dinhi an insidente han nakalabay nga Agusto 11, kun diin nagkamayda hin bungu-ay ha butnga han barko han China Coast Guard (CCG) ngan warship han People’s Liberation Army (PLA) samtang ginlalanat an BRP Suluan han Philippine Coast Guard.
Ha mao nga insidente, naguba an barko han CCG, waray panaman pahayag an China kasumpay ha posible nga nasamaran o namatay ha insidente.
Ha mao gihapon nga adlaw, duha nga barko han CCG an gumamit hin water cannon kontra ha duha nga barko han Bureau of Fisheries and Aquatic Resources (BFAR) nga nagdudumara hin maritime patrol ha nasabi nga lugar.
