TACLOBAN CITY – Pira nga klase hiton tamsi tikang ha iba nga nasud an nasipatan ha Sinirangan Bisayas.
Subay ha ginhimo nga waterbird census han Department of Environment and Natural Resources Region 8, maabot ha 2,612 nga mga migratory water birds yana nga tuig an nahikit-an hiton nasabi nga buhatan.
Kalakip ha mga lugar kun diin nahikit-an an nasabi nga katamsihan, in ha MacArthur Leyte, Carigara, Ormoc City, Eastern Samar.
Sumala kan Leira Merced – Development Management Officer II, Department of Environment and Natural Resources Region 8, an sugad nga panhitabo in nagpapakita la nga maupay pa an wetland hiton rehiyon.
Ha ira panginano, an nasabi nga mga tamsi in tikang pa ha Siberia Alaska, Australia ngan Pilipinas, kun diin kadam-an ha mga nakit-an sugad hiton talabong, tafted ducks o gugti nga klasi hiton itik ngan Philippine duck o mas kilala ha native name nga papan o patong gubat ngan an mga ine in ada ha listahan han vulnerable species nga may, 3,300- 6,700 nala an ihap han mga ine.
Subay ha Republic Act no. 9147, ine an balaod nga naghahatag hin pag-atiman ngan proteksyon ha mga wildlife nga subay ha section 28, an hino man nga madadakpan, nga nagbabaligya, nandadakop, ngan namamatay in posible nga umatubang ha 6-12 katuig nga kapresuhan, ngan may penalidad nga maabot ha P100,000.00 – 1 Milyon.
Padayon naman nga ginbabanatayan han DENR an posible nga epekto han bird flue nga dara hiton mga migratory birds ha nasud.
