-- Advertisements --
TACLOBAN CITY – Maabot ha 26 nga mga miyembro ngan supporters han New Peoples Army (NPA) ha Brgy. Pandol, Can-avid Eastern Samar an sumurender ha 14th Infantry Battalion.
Sumala kan Capt. Bryan Dolomente, Civil Military Operation Officer han 14th IB, kaupod ha mga sumurender an duha nga regular nga miyembro han NPA, 18 nga Milisya ng Bayan (MB), ngan unom nga miyembro han Communist NPA Terrorists (CNTs) Underground Mass Organization ha mao nga barangay.
Dugang pa hini nga kasagaran ha mga sumurender in magkakapamilya la ngan ngatanan ha mga ini in nag-uukoy ha mao nga barangay.
Pira naman ha mga rason han pagsurender han mga ini in mahitungod nga nasantop na nira nga gingagamit la hira han mga NPA ngan waray katuman nga mga ginpatapod ha ira.
Labot la hini padayon gihapon an ira ginbubuhat nga Community Support Program ( CSP ) para maaghat at mga katawhan nga suportahan an mga programa han gobyerno ngan diri mahugay ha mga patapod han mga rebelde.
Waray pa naman ginsurender nga armas han mga NPAs pero padayon an pag-aram han mga otoridad kun may nabilin pa nga armas han mga ini ha mao nga barangay.
Nahibaruan nga an mga regular nga NPA member an mga armado nga miyembro, samtang an Milisya ng bayan naman an mga gudti nga NPA nga gingagamit han mga armado kumo reserba, ngan an underground movement communist NPA an nag-iisip kun patiunan-o padadalaganon an ira barangay nga gin-uukyan.
Samtang padayon naman nga gin-aghat han mga kasunduluhan an mga rebelde nga sumurender na agud makatagamtam han Enhance Comprehensive Livelihood Integration Program ( E- CLIP ) kon diin tatagan hin livehood ngan financial assistance sindo mabalik ha gobyerno.
