TACLOBAN CITY– Opisyal na nga gintikangan an pagdumara han 2025 Ordinary Jubilee Year Pilgrimage Tour nga may-ada tema nga “Pilgrims of Hope” ha unom nga Diocese han Rehiyon 8, kakulop nga adlaw, Mayo 15, 2025.
Sumala kan Department of Tourism 8, Reginal Director, Karina Tiopes, ginbisita han 35 nga pilgrims an lima nga pilgrims churches sugad han Archdiocesan Shrine of Sto. Niño, Palo Cathedral, St. Francis Xavier of Abuyog, Our Lady of Immaculate Conception ha Burauen, ngan Sacred Heart Seminary ha Palo kun diin nagka-ada hin pag-ampo ngan paghalad ha mga simbahan.
Dugang pa ni Tiopes, panuyo hini nga Jubilee Year Pilgrimage Tour in maghatag hin naiiba o unique nga spiritual experience ha mga pilgrims pinaagi hiton pagbisita han mga simbahan, paghalad, pag-aro hin pasaylo han mga sala, ngan pagpapakusog han relasyon han Ginoo.
Ginmalatumat pa hine nga an Jubilee Year Pilgrimage Tour ha Eastern Visayas in makakabulig agud mas rumibhong pa an aton lokal nga ekonomiya, kasumpay na gihapon hiton nakaka-enganyo nga mga religious tourists.
Nakakahatag gihapon ini hin oportunidad ha local communities dara hiton hitaas nga demand han guide tours, local crafts, ngan cultural performances.
Ginpaangbit pa ni Tiopes, nga sunod nga bulan bibisitahon nira an nasasalin nga mga pilgrims churches sugad han Diocese of Borongan, Diocese of Calbayog, Diocese of Catarman, Diocese of Maasin, ngan Diocese of Naval.
