TACLOBAN CITY – Nakatalaan nga pagdumaraon ha maabot nga Hunyo 26-27, ha presente nga tuig an 2025 Banka Rumba kumo kaparte han kapatrunan han syudad han Tacloban.
Sumala kan Tacloban City Fishery Law Enforcement Team Coordinator, Felix Dumlao, ine in kumo pagkilala ngan paghatag hin pasidungog ha mga paru-pangisda han syudad han Tacloban.
An nasabi nga paisan-isan in mayda tulo nga kategorya — an Paddle Race (de-bugsay), Regatta (de-layag), ngan Bankarera (de-makina).
Pwede naman bumulig bisan pira an edad ha nasabi nga paisan-isan pero igche-check up anay ine ugsa magtikang an kompetisyon agud malikayan an mga dire ginlalauman nga panhitabo ngan masigurado nga “fit” ine bumulig ha paisan-isan.
Waray gihapon required nga kabug-aton han sarakyan nga gagamiton ha paddle race ngan regatta, ngan waray gihapon required nga horsepower ha makina nga gagamiton para ha bankakera.
Mayda naman cash prize nga makakarawat an mga magdadaog, amu an masunod:
Paddle Race (de-bugsay):
1st Place – P20,000
2nd Place – P15, 000
3rd Place – P10,000
4th Place – P8,000
Regatta (de-layag):
1st Place – P20,000
2nd Place – P15, 000
3rd Place – P10,000
Bankarera (de-makina):
1st Place – P20,000
2nd Place – P15, 000
3rd Place – P10,000
4th Place – P8,000
Agud makabulig ha paisan-isan, kinahanglan nga residente han syudad Tacloban an partisipante ngan kinahanglan mag-pasa han masunod: Barangay Clearance, Cedula, ngan 2×2 ID picture, an deadline han pag-parehistro in ha Hunyo 25, 2025.
Gin iimbitahan naman ni Dumlao an ngatanan han mga paru-pangisda nga bumulig ha nasabi nga paisan-isan.
