TACLOBAN CITY – Padayon nga gintatambal ha hospital an duha nga sundalo nga samaran ha nahitabo nga engkwentro ha butnga han militar ngan New People’s Army (NPA) Dominggo (Abril 7) ha Barangay Manlilinab, Basey, Samar.
Sumala kan Lt Col Rommel Cabanayan, Commanding Officer han 87th Infantry Battalion, nagbubuhat hira hin security operations ha natura nga lugar kaupod an 46th Infantry Battalion han tigda nala hira nga ginpauranan hin bala han mga rebelde nga grupo.
An gindudumara nga security operations han mga militar in kasumpay ha pangandaman ha tiarabot nga May 13 midterm elections.
Umabot naman hin 3 kaminutos an balyuay hin buto ha duha nga panig kon diin nag angkon hin slight injuries hira Sergeant Rolando Erilla ngan Private First Class Marvin Llena nga yana in aada na ha stable nga kondisyon.
Mababaruan nga nagkaada gihapon hin engkwentro ha Pinabacdao, Samar usa kaadlaw la mahuman an nahitabo nga engkwentro ha Basey.
Ha pagkayana in padayon ginbubuhat nga clearing ngan hot pursuit operation han mga kasundaluhan kasumpay han natura nga insidente.
