TACLOBAN CITY– Naugbaw an 2 nga residential house ha Barangay 8, Población Lawaan Eastern Samar.
Ginpapanig-iyahan an mga ine nira alyas Rene, ngan alyas Benny residente han nasabi nga lugar.
Sumala kan FO3 Mark Anthony Ola, Chief Operation Lawaan Municipal Fire Station, pasado alas 10:20 hiton gabi naka-karawat hira hin sunog,ngan dayon naman hira nakagresponde kun diin gindeklara an fire out pasado alas 11:43 hion nasabi nga gabi.
Subay ha ira imbestigasyon, nagtikang an kalayo ha panimalay ni Benny ngan matungod kasapit hine an panimalay ni Rene in lakip ine ha mga nasunog.
Nabaruan nga himo ha light materials an duha nga panimalay sanglit madagmit nga nagsarang an kalayo, kun diin gindeklara an mga ine nga totally burned.
Ginbabana-bana naman nga maabot ha P10K an ginbayaan nga danyos han nasabi nga sunog.
Ha pagkayana, padayon pa an gindudumara nga imbestigasyon han mga otoridad agud nga matudlok an hinungdan han kalayo.
Nagpahimatngon naman hi Ola ha publiko, nga dire hingalimot ha pagparong, pagtangal hiton saksak ngan sugadman siguraduhon nga nakaparong tanan nga aplayanses o diman ngani mga pugon ngan LPG agud nga makalikay ha posible nga kadelikaduhan hiton sunog.
