TACLOBAN CITY- Patay an duha nga lalaki mahuman nga pagpusilon ngan paninigbason kahuman in ginpugutan pa hiton ulo an mga biktima ha may Brgy. Balocawe Gandara Samar.
Ginkilala an biktima nga hira Renato Palambergo 50-anyos an pangidaron ngan hi Dionesio Caber 58-anyos an panuigon ngan parehas mga residente ha nasabi nga lugar.
Usa pa nga biktima an naka-talwas ha mao nga panhitabo ngan nagpakilala ine ha ngaran nga hi Magbutay, taga barangay Rawis, ngan hapagkayana in aada ha kustodiya han kapulisan.
Sumala PLT. Norvin Carbonera, Chief of Police han Gandara Municipal Police Station, nga subay ha ira nakuha nga impormasyon ha nakatalwas nga biktima, nga maabot ha lima katawo an suspek nga gintutuohan nga nagpapaluyo han mao nga panmasaker.
Ginhihingita naman nga angulo han mga kapulisan in an may paghisumpay ha pakabuhi nira nga koprahan nga rason kun kay-anu an mga ine ginpatay han mga waray pa pan-ngarani nga mga suspek.
Hapagkayana, in mayda na natudlok an mga otoridad persons of interest ngan padayon an ira gindudumara nga imbestigasyon.
Ginpatapod naman han mga kapulisan, nga ira na gin-aandam na an mga kaso nga igsisirot ha mga mapapamatud-an nga suspek ha nasabi nga panmatay.
