TACLOBAN CITY– Maabot ha 18 nga panimalay an naugbaw ha sunog ha Purok 4, Brgy. 97 Cabalawan, Tacloban City.
Ha mao nga ihap 17 dinhi an totally burned, samtang 1 naman an partially damage.
Sumala kan SFO2 Anthony Alvin Duran Chief, Intelligence & Investigation Unit BFP Tacloban City, pasado alas 12:06 hiton udto naka-karawat hin tawag an Bureau of Fire Protection kun diin dayon naman ine nga ginrespondihan.
Pasado alas 12:29 han udto na poypoy an kalayo, samtang 12:34 naman han nasabi nga udto gindeklara nga fire out.
Subay ha imbestigasyon, nagtikanga an kalayo ha kusina han usa nga balay, kun diin mayda hira nahikit-an nga improvised nga lutuan, nga gintutuohan nga nagin hinungdan han-kasunog han kasapit hine nga mga panimalay.
Waray naman nasamaran o namatay ha mao nga sunog.
Ginbabana-bana naman nga maabot ha P684,000 an ginbayaan nga danyos han nasabi nga sunog.
Ha pagkayana, padayon pa an ginhihimo nga imbestigasyon kun anu gud an gintikangan han kalayo.
