Gin sagdonan ni Senator Alan Peter Cayetano an 18 nga indibidwal nga nagpakilala kumo anay miyembro han Philippine Marines nga diri otorisado han pamunuan han Senado an pagbubuhaton nga hearing han Gatchalian bloc yana nga Lunes, Hunyo 8, 2026.
Ha surat nga igin padara ha abogado han grupo nga hi Atty. Levi Baligod, gin malatumat ni Cayetano nga diri tikang ha iya opisina o han Blue Ribbon subcommittee an mao nga imbitasyon.
Gin tagan duon pa ni Cayetano, nga diri aprubado ni Sen. Pia Cayetano kumo chairperson han Blue Ribbon Committee, o ni Sen. Rodante Marcoleta kumo chairperson han subcommittee, an nakatalaan nga hearing yana nga adlaw.
Subay pa kan Cayetano, an opisina la nira Sen. Pia Cayetano, Sen. Marcoleta, o an committee secretariat nga nagios ha ilarom han iya otoridad an puydi magpagawas hin mga opisyal nga abiso ngan imbitasyon para ha mga pagbubuhaton nga hearing han Blue Ribbon Committee.
Nagpahitngon gihapon hi Cayetano ha mga testigo kontra ha pag atender ha mga mga hearing nga diri otorisado an mga nagpakilala nga chairman han komite, mahitungod nga diri masisiguro han Senado an mga procedural safeguards ngan proteksiyon nga kasagaran igin hahatag ha mga na atubang kumo testigos.
Ginhimo ni Cayetano an pamahayag kasunod han mga pagbabag-o ha liderato han Senado kundiin, gin tudlok hi Senator Sherwin Gatchalian kumo Senate President Pro Tempore ngan acting Senate President. Kasunod han pagtudlok kan Senator Erwin Tulfo kumo bag-o nga chairman han Blue Ribbon Committee.
