TACLOBAN CITY— Umabot ha 1,564 nga mga pamilya o 5,798 nga mga indibidwal an nahipatik nga apektado han pag-uran durot han shearline, subay ine ha inisyal nga datos nga nakuha tikang ha Department of Social Welfare and Development.
Sumala kan Sher Rysiah Saises, Information Officer Office of Civil Defense Vlll, an malain nga panahon durot han Shear Line ngan Easterlies an nagdurot hin pagbaha ngan landslides ha pira nga parte han rehiyon.
Kasumpay hine, pira nga mga eskwelahan ngan mga trabaho in suspendido gihapon ha bug-os nga probinsya han Northern Samar ngan an klase ha ngatanan nga lebel in suspendido gihapon ha bug-os nga probinsya han Eastern Samar, magin ha probinsya han Leyte, ngan Southern Leyte.
Suspendido gihapon an klase ha mga eskwelahan ha siyudad han Tacloban, kalaki na an Babatngon, Carigara, Dulag, Leyte, Julita, Mayorga, Tabontabon, Burauen, La Paz, Palo, Alangalang, Tanauan, ngan Tolosa, Leyte.
Apektado naman an mga linya han tubig ha mga lugar han Dagami, Tanauan, Tabontabon, ngan Tolosa, Leyte tungod han naguba nga tubo han PrimeWater Leyte Metro ha Hiabangan ngan Hitomnog.
Labot la hine, naapektaran gihapon an linya han kuryente han pira nga mga kooperatiba ha rehiyon sugad han BILECO, LEYECO III, LEYECO V, ngan SAMELCO II, nakaeksperyensya gihapon an DORELCO hin pagparong pero nahibalik naman dayon supply hini han pasado alas 8 kagab-i.
Samtang,ginpatapod naman Department of Social Welfare and Development Eastern Visayas an kaandam kun diin naka-standby an 164,832 ka kahon han family food packs, 11,973 nga ready-to-eat food packs, ngan 18,543 non-food items an andam na nga igpanhatag ha mga apektado nga lugar.
Labot hini, mayda gihapon P2,593,000 nga pondo an ahensya nga naka-standby nga pwede magamit para hiton emergency reponse ha kalamidad.
