TACLOBAN CITY – Ginpasakahan na hin kaso han Presidential Anti-Corruption Commission (PACC) an mga opisyales han NHA ngan mga kontraktor nga responsable ha dire pa kompleto ngan substandard nga mga housing projects nga gintindog para han mga survivors han Super Typhoon Yolanda.
Sumala kan Dante Jimenez, Chairman han Presidential Anti-Corruption Commission (PACC) padayon an ira pagbuhat hin mga imbestigasyon ngan pagbiling hin mga ebidensya bahin han maanomalya nga Yolanda housing projects ha probinsya han Leyte ngan Samar.
Kasumpay hini in napasakahan na hin kriminal ngan administratibo nga kaso an 12 nga mga opisyales han National Housing Authority (NHA).
Waray naman maggawas hin mga ngaran an PACC ha mga napasakahan hin kaso pero an mga dabi nga opisyales kumo kaparte han due process,pero myembro daw an mga ini han Bids and Awards Committee han NHA ha Eastern Visayas.
An mga opisyales in maatubang hin kaso nga graft, pagtalapas ha procurement law ngan code of conduct for public officials ha Office of the Ombudsman.
Dugang pa ni Jimenez nga ha Eastern Samar pala, an kontraktor nga JC Tayag Builders, Inc. nga nagkaada hin P741 million contract para magtindog hin 2,558 nga units ha upat nga bungto pero gumawas ha imbestigasyon nga mahuman an duha katuig in maabot la hin 1.41 kaporsyento o kon 36 la nga housing units an naitindog hini.
Mababaruan nga ha target nga 205,128 nga mga permanente nga pabalay para hadton aada ha mga danger zones,100,709 pala an natima han nakalabay ng tuig.
Yana liwat nga adlaw in ginbisita han PACC an mga housing sites ha Julita Leyte ngan Tacloban para magdumara gihapon hin inspeksyon ngan pamatian an mga ungara han mga residente.
Ini mahuman an unom kabulan nga patapod han PACC nga mabalik hira para panginanuon an maiha na nga problema ha mga pabalay para han mga biktima han supertyphoon Yolanda.
