NATIONAL–Talwas nga naibakwit ha siyudad han Van ha Turkey an 11 ka Overseas Filipino Workers (OFWs) tikang ha Iran ha butnga han tension ha Middle East, sumala ha Department of Foreign Affairs (DFA).
Sumala ha DFA, ginbuhat an pagpaibakwit han mga Pilipino pinaagi han koordinasyon han mga embahada han Pilipinas ngan Tehran ngan Ankara, ngan nakatalaan nga makakauli ha Pilipinas ha masunod nga adlaw.
Samtang ginsigruado gihapon han ahensya nga padayon nira nga ginbubuligan an ginbabana-bana nga 800 ka Pinoy nga presente nga nangungukoy ha Iran nga naruruyag na nga makauli na ha nasud.
Kasumpay hine, ginabiso han DFA an mga Pilipino nga nanginginahanglan hin bulig nga magkipag-sumpayan dayon ha embahada pinaagi han ira mga opisyal nga hotline ngan social media channels.
Samtang, basar ha datos han gobyerno, mayada kabug-osan nga 1979 ka Pilipino ha 9 ka nasud ha Middle East an naruruyag na nga ma-repatriate kun diin pinakadamo ha ira in tikang ha Kuwait nga mayada 633 ka OFWs.
Pero, nagpapabilin ga sarado an airspace han pira ka parte han rehiyon mahitungod ha nagpapadayon nga giyera.
