TACLOBAN CITY- Napulo (10) nga mga Persons Deprived of Liberty (PDL) ha Tacloban City Jail- Female Dormitory an sumulod ngan kaapi ha Katatagan, Kalusugan at Damayan ng Komunidad (KKDK) Drug Rehabilitation Program han Bureau of Jail Management and Penology (BJMP).
Sumala kan BJMP Region 8 Regional Director JSSUPT Rill F. Sonon, DSC, JD an importansya han programa nga kun diin panuyuan hini nga mas pakusgon ngan padig-unon pa an rehabilitasyon han mga PDL partikular na adtun nag rerekober ha iligal nga droga.
“Before kasi, before maka avail han pre-bargaining an atun mga PDL’s, kailangan anay niya makaavail han 6-months rehabilitation program.” signgon ni Sonon.
Kalakip ha mao nga programa, an magkadurudilain nga mga modules nga pagsusundon ngan pag aagian han preso nga mag aandam ha ira para han utro nga pagbalik ha komunidad ngan reyalidad han kinabuhi ngan diri na utro nga bumalik ha nabuhat nga sala.
“Everyday mayda ini programa, tikang ha pagmata nira mayda corresponding assignment kada tagsa nga this is one way to encourage nga ini nga atun mga PDL’s inin kumapot hin responsibilidad bisan gutiay nga mga bagay, bisan naman la an iya tasking, kun hino an naassign paglabog han basura, kun hino an naka assign paglimpyo han cr.” dugang pa ni Sonon.
Ginkalipay naman ni Tacloban City Jail- Female Dormitory Acting Jail Warden SJ04 Judith B Balanay nga tikang han mag implementar hira, waray pa may naitatala nga utro bumalik ha presuhan nga mga nag agi han programa ha kapareho nga sala.
“Required po ha ira kay nag apply hira hin for probation nga usa han requirement nga diri na hira makaka enroll ha salag ha Dulag para pag gawas nira, diretso na hira ha ira balay.” yakan ni Balanay.
Ginklaro naman hini nga required la gihapon nga magreport an PDL ha probation monthly para han monitoring purposes nga nakadepende naman ha sentensya han huwes kun pira ka tuig.
Gintagan hin duon ni Sonon nga importante an mao nga programa agud nga diri na magbinalik-balik pa an PDL ha proseso han rehabilitasyon samtang naman nga gin aagi an pre-bargaining.
Gin aaghat naman ni Sonon an pamilya han mga PDL’s nga maghatag hin oras nga bisitahon an mga ini agud naman nga maabat nira an suporta ngan paghigugma labi na an makakabalik na ha komunidad.
An mao nga programa in gin iimplementar han BJMP ha bug-os nga nasud, nga kun diin, nagtikang na liwat nga mag implementar an Tacloban City Jail- Male dormitory ngan susubaron ini ha iba pa nga mga jail facilities ha rehiyon.
