TACLOBAN CITY – Ginpahibaro han Department of Agriculture Regional Office 8, nga mayda la mga gintudlok nga lugar o zones kun diin pwede maghayupan hin baboy ine in kasumpay han kaso han Afican Swine Fever o ASF.
Sumala kan Dr. Vincie Pantonino, Assistant ASF Focal Person hiton Department of Agriculture Regional Office 8, mayda mga magkaduru-dilain nga klase hin zone para ma-identify an usa nga lugar.
An Red Zone in amu an hot spot o an mga lugar kun diin mayda nagpositibo han nasabi nga virus, samtang an ada naman ha pink zone in amu an mga lugar nga nawarayan na hin positive cases han ASF virus pero kinahanglanon la gihapon nga ig monitor para han surveillance han status han lugar. An green zone naman in an mga lugar nga waray na kaso han nasabi nga virus.
Mahugot naman nga gindidire an pag-alaga han mga baboy ha mga Red zone nga lugar, sugadman ha mga lugar nga aada ha pink zone mahitungod nga dako la gihapon an tyansa han pagsarang han ASF.
Dugang pa hine, mayda gin susunod nga proseso an ira buhatan para ma-detect an nasabi nga virus kun diin nadepende ine ha area hiton lugar.
